LA GLÈISA DE PAPAS E EMPERAIRES
Anno 1536-die 26 iunji- Carolus V Imperator pertransivit Montes Corniae. Di parelh la pèira plaçaa dins la glèisa de Sant Pèire en Vincols, bastia dins lo 1363 sus lo viòl que portava al Mont Còrnio, encuèi coneissut coma Còl de Tenda. Mas l’Emperaire que menava lhi Lansquenets foguet pas lo solet personatge famós a passar per la valada: dins lo 1809 a Limon arribet decò Papa Pio VII, presonièr de Napoleon, dins son lòng viatge vers la fortèssa de Savona.

ENTRE BÒSC E PÈIRA
Dins la reconstruccion dal Tres Cents la glèisa faset siu lo cloquier romànic decorat da arquèts en cuèch e biforas, que fasia part d’un edifici pre-existent. Sa simpla façada en pèira es tripartia da lesenas o pilastres e sobremontaa da trumèls en cuèch, e a al centre una granda rosassa en marbre blanc. Lo portal a arc augival presenta una pintura a fresc dal XV sègle dediaa a la Depausicion de Criste. Dedins las vòutas a crosièras son definias da colonas en pèira dal luec, donaas das dozte familhas mai importantas de Limon, coma era tradiccion. Lo bèl pùlpit de bòsc dal XVII sègle ven da la Certosa de Pès.

LA VALADA DE LA NÈU
Òmes e fremas de la nobiltat, brilhants oficials de l’exercit, filhs e filhas, ensemp a vielhs e joves de la valada, durs e fòrts mas acostumats a l’esquí coma a un utís da trabalh: vaquì l’ambient entè mincatant un Prince o una jòlia Princessa di Savòia fan lor aparicion pas per assistir a una competicion o a un virtuosisme mas per s’esfidar abó esquís e bastons dins lo san exercici e l’alègra broderia sus la granda tèla blancha de la natura.
Parelh Michel Olivero dins lo 1928 descriu una jornaa sus la nèu a Limon, una des premieras estacions italianas a ponchar sus lhi espòrts d’uvèrn.