UN JURISTA DEVENGUT MONGE
La vida de Salvi, que foguèt un dels grands evesques d'Albi al sègle VI, es coneguda gràcias a la cronica de Grégoire de Tours. Salvi èra un òme letrat qu'ocupèt la carga d'avocat abans de se far monge, puèi venguèt abat e sa vida exemplària lo butèt, contra son grat, a la carga d'evesque en Albigés. Salvi faguèt tant e tant que cristianisèt la region, desliurant de presonièrs, anonciant la colèra de Dieu sus la familha del rei Chilperic… Moriguèt en 584, daissant Albi dins lo dòl e foguèt sebelit (segon la legenda) sus l'emplaçament actual de la glèisa. Se los plans e los fondaments de la glèisa son carolingians, l'edificacion de la glèisa actuala comencèt al sègle XI en estile romanic, foguèt arrestada per la Crosada e la construccion tornèt començar al sègle XIII, mas l'estile passèt al gotic. Las clastras que son atenentas coneguèron lo meteis sòrt e son coma la glèisa mitat romanicas, mitat goticas .

SUS LAS TEULADAS DE LA VILA VIELHA
Lo melhor punt de vista per descobrir Sant Salvi, es lo portal bèl de la famosa catedrala Santa Ceselha aquela meravilha del gotica occitan. D'aquí a un centenat de mètres, per dessús las teuladas de la Vila Vièlha, se quilha la torre romanica de pèira, de bandas lombardas, amb sa Gachòla (torreta que servissiá per susvelhar). Òm dintra dins la glèisa pel portal nòrd, l'arquivòuta, los arcs de vòuta, e dos capitèls sonque demoran del periòd romanic. Las quatre primièras travadas son romanicas e an totjorn lors capitèls.

LA MEMÒRIA DE TOULOSE-LAUTREC
Emai se Albi es conegut per sa remirable catedrala Santa Ceselha, e lo palais de la Berbia ont se tròba lo musèu Tolosa-Lautrèc, la glèisa Sant Salvi negada dins la Vila Vièlha que lo mond d'aicí sònan l'Albi Vièlh, s'amerita una descobèrta. Òm descobrirà la tranquillitat de sas clastras en plena vila, al mièg d'un barri plen de vida, ont totes los ostals son de l'Edat Mejana e an beneficiat d'una reabilitacion menimosa. Pels Albigeses, se Santa Ceselha es la catedrala del prestigi, Sant Salvi demòra la del còr.