LAS CALANDRETAS
Las Calandretas son d'escòlas laicas geridas per de benevòls, que utilison lo metòd de l'immersion dins la lenga occitana tre l'escòla mairala per dire que l'enfant se posque exprimir tant en occitan coma en francés, e subretot, posque acquesir las estructuras constitutivas d'aquelas doás lengas dins lo respièch de las especificitats de caduna. L'istòria retendrà que la primièra Calandreta (una calandreta es una jove lauseta que sap pas encara volar) espeliguèt dins la vila de Pau (Biarn) en 1979, foguèt lèu seguida per la de Besièrs. Los mèstres son diplomats e los programmes son confòrmes als de l'Educacion Nacionala de França. A l'ora d'ara son qualques dos mila calandrons que son escolarisats a travèrs Occitania, un collègi sonat «Leon Còrdas» s'es dobèrt en Lengadòc, un autre es en projècte en Biarn. Las Calandretas prepausan un ensenhament virat cap a la dobertura al mond amb lo bilingüisme, e apevat sus una pedagogia de l'autonomia, l'occitan i es lenga ensenhada e ensenhaira. Aquelas escòlas an bravament cambiat l'image de la lenga que èra, vint ans i a sonque un afar de vièlhs e de rurals, l'occitan ven jove e urban portaire d'avenidor dins l'Euròpa que se bastís. Las Calandretas son pas isoladas, participan del meteis moviment que vegèt florir Ikastòlas (País basc), Diwan (Bretanha), Bressòlas (Catalunha) … Se i a un avenidor per la lenga d'òc passarà forçadament per una reconquista de la lenga dins l'escòla, las Calandretas nos an mostrat lo camin.