A COMA ALPENC REFERENCIAL
L’ensemp de la lenga d’òc es caracterizaa da richessa, variabilitat e intercomprension entre lhi siei dialèctes. L’occitan des valadas, per lhi particulars tractes fonètics, fai partia des parladas dal Nòrd e presenta nombrosas variantas localas. S’empausa donc la necessitat d’una varietat referenciala alpina, que considere las sias particularitats totjorn en la gardant liaa a l’ensemp linguïstic occitan. Aquesta varietat referenciala es indispensabla per lhi ambients entè la parlaa locala semelha pas adeguaa, coma manuals, textes administratius, formularis, articols e per tuchi lhi documents en lenga d’òc destinats a la popolacion des valadas e de tota l’Occitània.