PADUS, BODINCUS E ERIDANUS
Abó aquesti noms lo Pò era coneissut da Virgilio, qu’en creient a una vielha legènda plaçava sa sorsa dins un bòsc de laurièrs dins lhi Champs Elises. En realitat, la ribièra qu’abó lhi siei 652 quilòmetros es la mai lònja d’Itàlia nais ai 2020 metres dal Plan dal Rei, ai pè dal Mont Vísol, e traversaa la plana que prend son nom finís dins la Mar Adriàtica abó un grand «delta». Lhi bòscs plaçats sus sias rivas aurion orígina mítica: Fetonte provet a menar lo car dal paire, lo Solelh, mas coma era pas expèrt anet tròp dapè a la Tèrra, e l’auria brusaa si Jòus abó un esluci l’auguesse pas fach tombar dins l’Eridan, sus las rivas dal qual las sòrres en grimas, las Eliadas, fogueron transformaas en albras.