Lo Marquesat de Saluces

Lo Marquesat de Saluces: un poder dal Piemont feudal que encara encuei es fòrça caracterizat pr'amor dal rescontre d'una edilicia senhorila, d'una rafinaa art de cort e d'una civila art de viure que an laissat ben de traças dins un baron de centres istòrics. Dins lhi sègles, aqueste pichòt mas brilhant estat feudal es estat l'as de liam entre lo Piemont, la França e la Ligúria.
Es ben d'aquí qu'a pilhat l'estil e la cultura dal gòtic de l'autre costat en se durbent decò a lo fial de l'umanèsim e de la Renaissença italiana.
Dins lo Piemont d'encuei i a pas d'equivalent dal centre istòric de Saluces, la pichòta "Siena des Alps" qu'encara encuei semelha arestaa dins l'aura enchantaa dal Quatre cents.
Un pichòt itinerari trucharè lo convent de Sant Joan e la Chapèla Marquionala, tomba di Marqués, lo Museo de Casa Cavassa ente se tròba la Pala d'la Misericòrdia d'Hans Clemer, la Montaa al Chastèl abo lhi prospects frescats di Palais de la Vila e des Arts Liberalas, e lo Dòm de l'Assoncion.
Encara aüra lhi chastèls de Revèl, Chastelar, La Morra, la Manta, Costilhòles, Mont Mal son aquí a receber tuchi aquilhi qu'arribon dins las valadas Pò, Varacha, Maira, Grana, coma memòria dal podèr marquional. Un'edilicia de chastèl, un mond de vinhas, abaïas e quietas ruaas, domeni dal mon de la plana, que laissa lo pòst, entrant dins las valadas, a la vièlha sapiencia de la civiltat de la pèira esculturaa.